【梨园逸事】“芳腔”创始人芳艳芬

       “云想衣裳花想容，春花万紫与千红……”呢段音韵悠扬嘅《红鸾喜》唱腔，充分发挥鼻腔共鸣，腔调圆润雅淡，感情丰富，温婉柔和。呢种粤剧嘅腔口就叫做“芳腔”嘞。
 

       五十年代，香港有一个花旦，佢演技高超，人靓声甜，大受戏迷爱戴，佢一演戏，后台就会摆满戏迷送嘅鲜花同埋人参汤、鸡汤、冰糖燕窝等礼物架嘞。一九五三年，佢先至廿五岁，就演左六十几部大戏，主演咗一百五十部电影，畀香港戏迷评选为“粤剧花旦王”。至犀利系佢创立咗一个自己独特嘅唱腔——“芳腔”，呢个咁叻嘅花旦就叫芳艳芬嘞。
 

      芳艳芬真名叫梁燕芳，出生喺广东恩平县。因为养母系戏迷，燕芳就对粤剧产生咗兴趣，後来拜粤剧前辈王九做开山师父，推荐佢到戏班学戏，由音乐家易剑泉同佢改个艺名“芳艳芬”。初踏台板，佢仲同红线女一齐做过《六国大封相》嘅提灯宫女，十三岁开始做二花，几年后升做正印花旦。芳艳芬十六岁个年，佢喺广州《大龙凤剧团》演出，以一曲《夜祭雷峰塔》成名。佢嘅成名戏仲有《红鸾喜》、《洛神》、《窦娥冤》、《火网梵宫十四年》等。佢自创嘅《反线二王》腔，盛极一时，呢个时候，“芳腔”开始得到行内外人嘅承认，广为流行。
 

      芳艳芬嘅性格好温和，人缘极好。人地话，老倌唱野声如其人，佢嘅声音好甜美，好娇柔，所以佢嘅唱腔亦系好柔软，好似莺声婉转咁样。喺《红鸾喜》入边嘅“二王”腔：“一曲玉琵琶，奏出阳春白雪，飘飘仙乐，乐无穷。。。。。。”唱到“乐无穷”个尾腔时，佢用鼻颚发声，用鼻腔哼咗两个温柔嘅滑音，令人听嚟如饮醇酒，如沐春风。
 

       接落嚟：“人说只羡鸳鸯不羡仙，人人都说神仙好，由来空即是色呀，色即是空。”芳艳芬嘅呢段“芳腔”，甜美娇柔，佢独特嘅气息声，令人好似听紧一位温柔美女喺你耳边轻吟浅唱，令你回味无穷，呢个就系“芳腔”受人欢迎嘅原因嘞。
       你话“温柔”，边个会抗拒呢？“温柔”，就系“芳腔”嘅魅力嘞。

        本稿件转载自粤剧花旦电视节目主持李池湘公众号，作者为李池湘，仅作传递资讯之用，本网站不对其稿件负任何责任。