【梨园逸事】虾腔鼻祖罗家宝

       虾腔，系粵剧大老倌罗家宝嘅唱腔，罗家宝小名叫“ 阿虾 ”，所以佢嘅唱腔就叫做虾腔嘞。虾腔自然流畅，共鸣强烈，行腔不事雕饰但系却好有华采。
 

       粵剧嘅唱腔流派好多，有红腔、风腔、新马腔、芳腔等，其中最多人唱嘅就系虾腔，因为虾腔系最简单最易学嘅。
       虾叔出身喺粵剧世家，佢自细喺戏棚听住啲老倌唱嘢长大，所以佢对演唱好有心得，佢集取各家之长，结合自己高音声线唔系咁好嘅特点，创造咗独树一帜好听好唱嘅 “ 虾腔 ”，因为佢嘅唱腔高音区唔多，难度唔大，好适合业余粵曲发烧友学唱 ，呢个亦系虾腔流行嘅原因。
 

       虾叔中音音色浑厚甜润，佢嘅表演精湛洗炼，扮相儒雅温文，风流倜傥，喺五、六十年代系有名嘅“师奶杀手”，当时佢做首本名戏《柳毅传书》，晚晚都有几十个师奶自发组团捧佢场，重跟住佢走埠登台，买票送花，煲汤送水，由化装睇到散场卸装，一时成为佳话。
       虾叔主演嘅《柳毅传书》亦创下咗历演四十年不衰嘅奇迹，其中剧中嘅唱段，更系脍炙人口，家喻户晓。
 

       虾腔名曲非常多，有：《枊毅传书之花好月圆》、《祭玉河》、《红梅记之石牢咏》、《苏小妹三难新郎》、《再进沈园》等。如果话虾腔嘅初期系自然流畅嘅话，咁虾腔嘅后期就好似一煲广州嘅老火靓汤，更加味道浓郁，趋向完美嘞。虾叔系个对艺术好认真嘅人，每一支曲佢都认真研究人物，根据人物嘅性格同时代背景设计唱腔。好似虾叔后期嘅《梦断香销四十年之再进沈园》，里面嘅长句二黄，喺行腔上边就多咗啲苍桑嘅味道：“斜阳画角哀，诗肠愁满载，沈园非复旧池台。红酥手，黄滕酒，泪湿鲛绡人何在。桃花落，闲池阁，依然春去又春来。梦断香销，屈指算来四十载。
 

      “唱到“四十载”一句时，带有叹息嘅声音，用情绪帶腔，将曲中人陆游嘅心境表达咗出嚟。唱到二流：“北地楼台！酬妹愿待来生，惟有封候事在。有诗情和将略，未许轻付尘埃，凭高酹酒此兴悠哉，两鬓虽秋豪情未改。愿明朝北定中原平四海，当向泉台告捷慰妹哀！ ”呢一段唱腔，虾叔嘅运腔唱得简朴自然，好似将主人公嘅心声自然流露出来，无花巧嘅拉腔却更见华采，更显示出虾腔嘅魅力。
 

        本稿件转载自粤剧花旦电视节目主持李池湘公众号，作者为李池湘，仅作传递资讯之用，本网站不对其稿件负任何责任。