【梨园逸事】名丑梁醒波

       喺香港粤剧舞台，有一个丑生王，佢嘅一生都畀咗粤剧，畀戏迷带嚟欢乐同埋笑声。佢嘅造型敦厚搞笑，佢嘅唱腔谐趣生鬼，佢嘅表演灵活多变，令戏迷喜爱有加，佢就系一代名丑梁醒波嘞。
 

        梁醒波（1908-1981年）男，广东南海人，新加坡出生。原名梁侍海，出身于梨园世家，父亲梁悦系粤剧名伶声架悦。梁醒波师承鬼马流同大胆根，初系粤剧文武生，后改丑生。代表作品：《呆佬拜寿》《光棍姻缘》《钓鱼郎》《紫钗记》《帝女花》等。经典之作深入人心。
 

       梁醒波为人乐观，成日笑口吟吟，行内人都亲切咁叫佢做“波叔”。 波叔曾经同我地讲过，佢做丑生最紧要二样：一系爆肚、执生。唔死搬剧本，睇住观众嘅情绪嚟做戏。观众有兴趣就做长啲，观众无反应就快啲转话题。二系要脸口生鬼、表情夸张。用夸张嘅表演令观众共鸣，带住观众嘅情绪走。
 

       戏迷最钟意波叔嘅<<光棍姻缘>>  ，佢一出场，双眼左右一碌，个肥肚腩一松一缩，观众即时畀佢嘅生鬼神情逗得好想笑。波叔再唱：“担番口大雪茄咋，充生晒认经理噃，捞世界要醒目，一于当玩把戏之嘛。”佢一边唱一边运用脸部表情，再配埋啲得意动作，引到观众哈哈大笑，
 

         观众话：波叔真系个开心果呀！
         波叔处世哲学好简单，同人相处不过多计较，既同“上流社会”交往，也同贩夫走卒打交道。
 

        佢话：“熟悉人地嘅生活，同佢哋交朋友，系一件快乐事，对塑造角色亦大有帮助，亦系我做丑生成功嘅秘诀。”波叔随和待人，认真演戏，真不愧为一代名丑！
 

        本稿件转载自粤剧花旦电视节目主持李池湘公众号，作者为李池湘，仅作传递资讯之用，本网站不对其稿件负任何责任。