【梨园逸事】识叹老倌小神鹰

       喺戏行，个个都知有一个老倌佢好识叹，好识保养，到咗今时今日七十岁，佢仲系声如洪钟，双眼炯炯有神，佢就系小神鹰嘞。
 

       戏行嘅人都听中医师讲过医理，人体嘅心、肝、脾、肺、肾，被分为“五行”，即金木水火土，系要分季节嚟调理，“秋冬防肺燥，春夏去脾湿”，调理好身体，声音就自然会好啦。小神鹰养声有道，入行几十年，佢从唔食煎炸食物，保持心境平和，遇事不怒，所以佢几十年嚟无乜点沙声同失声嘅。
 

       小神鹰佢话，声系父母畀嘅，保养就靠自己嘞。以前有个老倌好靓声，音域好宽，能唱“三喉”，即大喉、平喉、子喉。点知佢唔识珍惜，食烟、饮酒、讲粗口，三喉就变成二喉，再后嚟变本加厉，仲加埋食野唔介口，晚黑好夜都唔肯抖，到最后一喉都无埋，由此可见养声系几咁重要呢。
 

       小神鹰，原名梁锦伦，生于1939年，顺德杏坛人，7岁学艺，9岁登台，佢聪明伶俐，被称为“神童”。从艺六十几年嚟，小神鹰主演过《怡红公子悼金钏》、《大闹梅知府》、《风雪卑田院》、《周瑜归天》、《赵子龙摧归》等戏，佢嘅表演足迹踏遍美国、加拿大、东南亚等地，因佢武艺高强，声音宏亮，功架扎实，能文能武，演戏投入而受戏迷喜爱。
 

       小神鹰演嘅赵子龙，好有威势，七情上面，啲戏迷好钟意架。小神鹰有个习惯，开场前佢唔钟意同人倾计嘅，佢会着好戏服静养入戏，调均呼吸，饮番啖靓普洱或者参茶。听到开场锣鼓打响嘞，佢就好似换咗一个人咁，只见佢双眼一瞪，平时温文尔雅嘅佢，即刻变成一只老虎仔，踩住鼓点出场，亮相，虎虎生威，赢得观众热烈嘅掌声。一开声唱，如雷贯耳：“俺赵云，保主过江，凭忠勇！”几下马荡子，反身亮相，动作干净利索，威风凛凛。
       喺舞台上生龙活虎嘅小神鹰，一啲都唔似年纪咁大嘅老人，呢个就佢识叹，识保养嘅结果嘞。睇嚟我地要记住小神鹰讲嘅话：“父母畀你嘅身体就好似老本一样，要保本，仲要慢慢驶，咁就襟驶嘞！”
 

        本稿件转载自粤剧花旦电视节目主持李池湘公众号，作者为李池湘，仅作传递资讯之用，本网站不对其稿件负任何责任。