• 当前位置:主页 > 信息与评述 >

    【红船旧话】万能泰斗薛觉先

    发布时间:2016-11-02 作者:李池湘 来源:粤剧花旦节目主持李池湘 点击:

          薛觉先(1904年-1956年)男,原名薛作梅,广东顺德人。佢出身于粤剧世家,十兄弟中排行第五,二姊薛觉芳,三姊薛觉非同埋九弟薛觉明三人,都系粤剧演员。
     


     

            薛觉先1923年入人寿年班。因天资聪颖,二十岁已经做正印文武生。佢嘅手本戏有《胡不归》、《姑缘嫂劫》、《范蠡献西施》、《宝玉哭晴雯》、《梅知府》等。佢锐意“融南北戏成一家,合中西乐为一体”,创立咗“薛派”表演艺术,有粤剧“万能泰斗”嘅美誉。
           佢取消咗“师约制”,打破红船陋规;杜绝上台“爆肚、”“吞生蛇”同埋“饮汤”、“换垫”等陋习;佢喺“五架头”中式乐器入边,加咗小提琴、吐林必、瑟士风、吉他嘅西洋乐器同埋京剧锣鼓;佢融合咗京剧嘅武功、身段、舞蹈技艺,开创咗“北派”嘅开打场面;佢仲系第一个将粤剧搬上银幕,扩大咗粤剧普及面嘅大老倌。
     


     

           薛觉先嘅唱腔重视因人而异,善于表达内心感情,韵味浓郁,行腔干净得体,善于突破曲调中板眼、句格嘅习俗唱法嚟创新腔,令人感到既风流潇洒而又高雅庄重。特别是二王声腔,唱得飘逸超脱。所以自成一家,独树一帜,成为著名嘅"薛腔"。
     


     

           薛觉先独创了“长句二王”、“长句二流”、“长句滚花”等板式,普及提高咗“反线中板”,佢强调人物思想性,将剧中人物性格融入唱腔中,系“以情带腔” 嘅最先驱者。好似《姑缘嫂劫》嘅“祭飞鸾后”,佢出人意料噉用“子喉腔”演唱成段“反线中板”:“思前事,委曲娥媚,惨过马嵬赐死,这都是孤一时之错,非是主意如此……”如果唱正常嘅唱法,就会显得太硬朗,同人物当时嘅情绪相背离,薛觉先大胆噉采用子喉腔嚟唱,畀人感到委婉柔畅,将糊涂郡主嘅思悔之情表现得淋漓尽致。佢喺大半个世纪前就噉样大胆突破,强调咗‘程式’系为‘内容’服务嘅艺术方向,真系好难得。
     


     

            呢段唱腔亦喺行内最推崇嘅,设计得特别又好听,就系《胡不归》嘅“长句二流”:“情踌怅,意凄凉,枕冷鸳鸯怜锦帐,雾云锁月,枕冷衾寒。”“寒”字拉咗个好柔嘅长腔,“合合 尺工五了 合 ___”佢压住气口,用一种接近叹息嘅唱法嚟唱,显示出人物嘅无奈,凄然,压抑。
            佢引入西洋乐器,创立新腔,独创薜腔,把舞蹈及京剧"北派"引入粤剧舞台,丰富粵剧嘅表演,功德无量,故讲佢系粤剧泰斗式老倌,并不为过也!
     


            本稿件转载自粤剧花旦电视节目主持李池湘公众号,作者为李池湘,仅作传递资讯之用,本网站不对其稿件负任何责任。