【梨园逸事】三喉老倌郎筠玉

       讲到大老倌郎筠玉，好多戏迷都中意佢，係因为佢多才艺，能文能武，仲有就系，佢可以唱三样喉底： 子喉、平喉，大喉，呢个可能好多年轻嘅戏迷都唔知呢。
 

       一般嘅花旦，能唱平喉同子喉已经好唔简单咯，郎筠玉能唱三喉，喺行内花旦中暂时得佢一个。唱三喉首先係佢把声好靓，音域好宽广，仲有佢童年时曾经跟过有“大喉泰斗”之称嘅熊飞影学唱大喉。佢13岁就到广州先施公司天台全女班剧团做大戏，做小生同埋武生。抗战爆发之后，郎筠玉又到香港加入咗“镜花艳影” 全女班，同任剑辉、陈皮鸭等名演员同台演戏，打落深厚嘅基础，係一个大班出身嘅老倌嚟。
 

       郎筠玉1939年喺广州等地演出之后，就加入咗下四府班担戏，由二小跃升为文武生。佢多才多艺，戏路好广，唱功造诣好深，子喉、平喉，大喉嘅运用都有独到之处。戏迷最中意佢演《平贵别窑》嘅戏，文场戏唱平喉，显现出薛平贵对三姐柔情款款。武场戏唱大喉，显现出薛平贵武将嘅凛凛威风。
 

       解放后，郎筠玉到咗广东粤剧院，因为当时人才云集，佢就以演花旦为主嘞，之后佢就无唱过大喉咯。佢做嘅《花木兰》广州戏迷印象最深，佢女扮男装威风八面，喺战场杀敌，佢耍嘅一套枪下场动作，难度好大，有“正手花”同埋“反手花”，仲有连环“点反身”，最精彩嘅係向上抛枪再转身反手接枪，呢个优美嘅动作令观众拍烂手掌大声叫好。
 

       郎筠玉嘅文戏都好受观众欢迎架，佢同关国华演嘅《仕林祭塔》，佢做嘅白素贞，扮相端庄秀丽，做手柔软优美，唱腔宛转动听，畀人留低深刻印象。佢仲演过《梁山伯与祝英台》《咬脐郎会母》《白毛女》等名剧，真係一个文武全材嘅有料老倌呀！